Statsbudsjettet: 1,9 milliardar til Nord universitet

Det er i budsjettet gitt klarsignal til Statsbygg for finansiering av ombygginga av Kudalsveien 4 i Bodø. Bygget huser i dag studentersamfunnet ved Nord universitet, masterrom for studentane, samt kontor- og undervisningslokale. Statsbygg finansierer prosjektet, medan Nord universitet leiger lokala.

– Det er positivt at ombygginga av Kudalsveien 4 ligg inne i budsjettforslaget. Dette er eit viktig prosjekt for Nord universitet, og vil gi studentane våre betre og meir føremålstenlege areal, seier fungerande rektor ved Nord universitet, Levi Gårseth-Nesbakk.

107 millionar til ombygging: Kudalsveien 4 i Bodø huser i dag studentersamfunnet ved Nord universitet, masterrom for studentane, samt kontor- og undervisningslokale. Foto: Svein-Erik Olsen / Samfunnet i Bodø.

Budsjettforslaget inneheld ein reduksjon på 18,3 mill. kroner for å frigjere midlar til omprioriteringar i sektoren. Dette var ikkje venta, og for universitetet som heilskap inneber forslaget ein realnedgang på 1,4 prosent.

– Vi hadde håpa på ei sterkare ramme, mellom anna for å kunne styrkje arbeidet med tryggleik og beredskap. Når vi likevel skal planleggje verksemda framover, er det viktigaste no å bruke ressursane godt og prioritere dei områda der Nord universitet kan bidra mest til samfunnet sine kompetansebehov, seier Gårseth-Nesbakk.

Helse og realfag får større betydning

Eit sentralt element i årets budsjettforslag er innføringa av eit nasjonalt kompetansebudsjett. Regjeringa legg opp til at utviklinga av utdanningstilboda i større grad skal sjåast i samanheng med framtidige behov for arbeidskraft. Helsefag og realfag blir særleg trekte fram.

Universitet og høgskular er samtidig venta å prioritere studieporteføljen i tråd med identifiserte kompetansebehov, samarbeide meir om utdanningstilboda og bidra til at fleire studentar fullfører.

– Dette er tydelege signal om kva retning norsk høgare utdanning skal utvikle seg i. For Nord universitet er dette relevant, og vi skal ta omsyn til dette i vårt arbeid med studieporteføljen. Vi utdannar allereie mange av kandidatane samfunnet treng innan helse og andre profesjons- og arbeidslivsnære fag, seier Gårseth-Nesbakk.

Får 1,9 milliardar: – Vi hadde håpa på ei sterkare ramme, seier Levi Gårseth-Nesbakk, fungerande rektor ved Nord universitet. Foto: Bjørnar Leknes.

Han meiner dei nye føringane også vil bli viktige i den vidare utviklinga av studieporteføljen og studiestadene til universitetet.

– Framover blir det endå viktigare å kunne dokumentere kva for kompetanse arbeidslivet treng, kvar kandidatane våre går etter fullført utdanning, og kva verdi utdanningane skaper i regionane våre. Det handlar ikkje berre om kvar utdanningane ligg, men om kva for kompetanse dei bidreg med, seier han.

Skal framleis ha ei sterk regional rolle

Nord universitet har ei særleg rolle i å utdanne kandidatar til arbeidslivet i Nordland og Trøndelag. Universitetet samarbeider med arbeidsliv, kommunar, helseføretak, næringsliv og andre utdanningsinstitusjonar om å utvikle relevante utdanningstilbod.

Regjeringa si forventning om meir samarbeid, fleksible utdanningar og sterkare kopling mellom utdanning og arbeidsliv er derfor sentrale signal for Nord universitet.

– Nord universitet skal vere tett på samfunns- og arbeidslivet. Vi skal bruke det breie regionale nærværet vårt til å møte kompetansebehova i regionane våre, samstundes som vi utviklar utdanning og forsking med nasjonal og internasjonal betydning, seier Gårseth-Nesbakk.

Han understrekar òg at universitetet sjølvsagt skal ivareta det internasjonale engasjementet sitt, mellom anna gjennom alliansane Sea-EU og Arctic 6.

Vidarefører løyvinga til Nasjonaljubileet 2030

– Det er også positivt at regjeringa vidarefører løyvinga som blei gitt i fjor til forskingskoordinator og forskingsnettverket for Nasjonaljubileet 2030, legg Gårseth-Nesbakk til.

Nord universitet koordinerer dette arbeidet, medan løyvinga blir gitt til Museet Arven. For 2026 blei det løyvd 2,6 millionar kroner, medan det i forslaget til 2027-budsjett er sett av 2,73 millionar kroner til prosjektet.